Professional ta’limni rivojlantirish instituti va Nemis Xalq Universitetlari assotsiatsiyasining (DVV) Toshkent filiali o‘rtasida xamkorlik to‘g‘risida imzolangan shartnomaga muvofiq ko‘plab o‘quv tadbirlari o‘tkazib kelinadi. Ushbu shartnoma doirasida 2023-yil 6-oktabr kuni DVV tashkiloti ekspertlari tomonidan Professional ta’limni rivojlantirish institutida “Yashil iqtisodiyotda professional ta’lim muassasalarining barqarorligini ta’minlash” mavzusida trening o‘z ishini boshladi. Treningda Professional ta’limni rivojlantirish instituti professor-o‘qituvchilari va xodimlari ishtirok etib, ular ekologiya va yashil iqtisodiyot masalalari bilan bog‘liq yangi bilim va ko‘nikmalarga ega bo‘ldilar.

Joriy yilning 9-sentyabr kuni Professional ta’lim tizimi rahbar xodimlari IChTBDO‘ guruhi uchun SCAFFOLD vositalaridan foydalanish metodikasini o‘qitish bo‘yicha seminar-trening tashkil etildi. Mazkur seminar-trening institut xodimi B.Haydarov tomonidan olib borildi. Ushbu seminar-treningda professional ta’lim tizimi o‘quv jarayonlarini tashkil etish va loyihalashda SCAFFOLD qatalarining o‘rni va ularning mohiyati, SCAFFOLD kartalaridan foydalanish va SCAFFOLD kartalari orqali o‘quv jarayonlarini rejalashtirish texnologiyalari tahlil qilindi. Ishtirokchilar kichik guruhlarga ajratilgan holda SCAFFOLD kartalaridan foydalanib, o‘quv mashg‘ulot rejasi ishlab chiqdilar va har bir guruh a’zolari tomonidan ishlab chiqilgan o‘quv mashg‘ulot rejasi bo‘yicha taqdimot amalga oshirildi.

Joriy yilning 27-sentabr kuni Germaniyadagi Oberxessen Shparkassasi mutaxassislaridan biri Shabana Zargarzada xonim ishtirokida “Dual ta’lim muvaffaqiyat modeli: Germaniya Shparkassalar moliyaviy guruhidagi talablar, shartlar hamda jarayonlar” mavzusida seminar tashkil etildi. Mazkur seminarda Dual ta’limi va Oberxessen Shparkassa ta’lim tizimi, Germaniyadagi banklar tizimi va Shparkassa akademiyasidagi dual ta’limining o‘ziga xos xususiyatlari, dual ta’limining Shparkassalar tizimidagi ahamiyati va ularga qo‘yilgan talablar hamda shart-sharoitlar, Shparkassa akademiyasida dual ta’limini tashkil etish masalalari ko‘rib chiqildi. Ushbu seminarda Professional ta’limni rivojlantirish instituti malaka oshirish kurslariga jalb qilingan professional ta’lim muassasasi rahbar va rahbar o‘rinbosarlari ishtirok etdi. Tadbir yakunida ishtirokchilar tomonidan mavzuga doir o‘zlarini qiziqtirgan savollarga mutaxassis tomonidan javob oldilar.

2023-yil 13-mart kuni “Ipak yo‘li” xalqaro universiteti qoshidagi Toshkent turizm va mehmonxona menejmenti texnikumida “Umumiy ovqatlanish xizmatlarini tashkil etish” mavzusida amaliy seminar tashkil etildi. Tadbirda amaliy mashg‘ulotlarni o‘tkazish metodikasini o‘rganish hamda tajriba almashish maqsadida Toshkent turizm va biznes kolleji, Sergeli tumani kasb-hunar maktabi va Sirdaryo tumani kasb-hunar maktabi o‘qituvchi va o‘quvchilari ishtirokida maxsus dastur asosida o‘quv-amaliy mashg‘ulotlar o‘tkazildi. Shuningdek “Turizm” va “Mehmonxona xo‘jaligini tashkil etish va boshqarish” yo‘nalishlari bo‘yicha amaliy o‘quv mashg‘ulotlari ochiq dars ko‘rinishida namoyish etildi. Amaliy seminarda Rossiya Federatsiyasi Professional ta’limni rivojlantirish instituti (IRPO) hamda Pedagogik innovatsiyalar instituti rahbariyati mehmon sifatida ishtirok etdilar.

Pedagogik innovatsiyalar, professional ta’lim boshqaruv hamda pedagog kadrlarni qayta tayyorlash va ularning malakasini oshirish instituti va Rossiya Federatsiyasi Professional ta’limni rivojlantirish instituti (PTRI) bilan 2023-yilning 21-may yakuni “Milliy malaka tizimlari, malakalarni baholash markazlarini tashkil etish: muammo va yechimlar” mavzusida seminar-trening bo‘lib o‘tdi. Seminar-treningda O‘zbekiston va Rossiya Federatsiyasi Milliy malaka tizimlari, Tarmoq kengashlari faoliyati, kengashlar huzuridagi Malakani baholash markazlari faoliyatlari qiyosiy tahlili o‘tkazildi, mavjud muammolar va ular yechimi yuzasidan tomonlar fikrlari eshitildi. Kelgusida o‘zaro hamkorlik doirasida professional ta’lim tizimini metodik ta’minlash, ta’lim mazmuni va sifatini oshrish bo‘yicha ilmiy-amaliy tadbirlar o‘tkazish kelishib olindi.